Ibrahim Mantu: Nigeria president Muhammadu Buhari mourn passing of former deputy senate president

President Muhammadu Buhari dey mourn di passing of di former Deputy Senate President, Ibrahim Mantu.

President Buhari for statement through im Special Adviser on Media and Publicity, Femi Adesina, say di late Mantu bin dedicate im life to di service of im pipo.

Di former deputy senate presido for Nigeria Senator Ibrahim Mantu don die after brief illness according to Shehu Nura wey dey close to di Mantu family.

Mantu wey bin dey very popular during e time for senate serve as deputy senate president of Nigeria between 2003 to 2007.

E come pray for im soul as e follow tok say: “…im legacy of reconciliation and promotion of peaceful co-existence go always dey remembered, especially as e bring more peace to im state and di kontri”.

Di funeral rites for di late Mantu go happen on August 17, for di Sheikh Khalid Mosque for Abuja.

Shehu say Mantu die for DIFF hospital for Abuja after 10 days illness and dem go bury am today according to di young politician.

Who be Senator Ibrahim Mantu?

Senator Mantu na prominent and controversial Nigerian politician. Im be member of di Board of Trustees and National Executive Committee of di Peoples Democratic Party.

E first join politics for 1978. For 1993, im become di Director-General of di National Republican Covention Presidential Campaign Organisation.

For di beginning of di fourth republic for 1999, Mantu win position of Senate representing Plateau Senatorial District on PDP platform.

Oga Mantu become Deputy Senate President of di Nigerian Senate between 2003 to 2007.

For interview wit tori pipo Channels on March 30, 2018, di controversial politician tok about how im take help im party rig elections “by providing financial inducement.”

Oda tributes and condolences