Nigeria Senate say dem no propose to create 20 new states.
Di lawmakers dey try dismiss some kotri pipo don make pipo believe.
E dey come afta local tori pipo report say di lawmakers wan change di 1999 Constitution to add join di 36 states wey dey di kontri.
Now di Senate don comot to say di reports na “big misrepresentation”.
For statement wey di tok-tok pesin Senator Ajibola Basiru release, e say:
Di Senate go okay di creation of states if “e dey compliant wit di provisions of section 8 of di 1999 Constitution of di Federal Republic as amended”.
Instead, wetin dem wan do, Basiru bin say, na to ask di kontri elections office INEC to torchlight di request wey some pipo bring come.
Di move na to see if e comply wit regulations of di land, di Senator add.
Nigeria start wit three regions when dem gain independence from British colonial rule for 1960.
Dem be Northern, Western, and Eastern regions and e remain like that till 1976.
By 1987 – 27 years later – e don grow to 21 states, plus di Federal Capital Territory (FCT) wey dem do for Abuja.
Di latest change na for 1996, wey boost di total to 36 states.
Those in support of new states say e go epp national resources wey some states dey get to divide well-well.
Meanwhile di pipo wey oppose am argue say di kontri dey struggle to administer resources among di 36 states and FCT, so e no make sense to form new ones.
Dem also say e go encourage corruption.
Wia di new proposed states dey?
According to reports wey local tori pipo dey cari, see some of di proposed states and wia dem wan take dem from:
- ITAI State (from Akwa Ibom State)
- State status for the FCT
- Katagum State from Bauchi State
- Okura State from Kogi East
- Adada State from Enugu State
- Gurara State from Kaduna South
- Ijebu State from Ogun State
- Ibadan State from Oyo State
- Tiga State from Kano State
- Ghari State from Kano State
- Amana State from Adamawa
- Gongola State from Adamawa
- Mambilla State from Taraba State
- Savannah State from Borno State
- Okun state from Kogi State.
- Etiti State from the South East Zone
- Orashi State from Imo and Anambra states
- Njaba from the present Imo State
- Excision of Aba State from Abia State;
- Anioma State from Delta State
- Torogbene and Oil River States, from Bayelsa Delta and Rivers states
- Bayajida State from parts of Katsina, Jigawa, and Zamfara states