Big Brother don reveal di identity of di two wildcards of season six for di reality television show.
Di wildcards na Pere and Maria and na during di diary session Biggie reveal am to di viewers
Di wildcard na new twist wey Big Brother introduce dis season for di show wey start on Saturday July 24, 2021.
Na 22 housemates enta Biggie house dis season.
- Wetin Biggie early twist about ‘wildcard’ dey about
- Meet Big Brother Naija ‘Shine Ya Eye’ housemates
Tori be say Biggie give di house di task to discover who dis two housemates be and so far everybody don turn detective ontop di matter including di fans too.
According to Biggie, di wildcards na fake housemates wey im put for di Shine Ya Eye House.
Who be di two Wildcard for BBNaija season 6?
As Housemates still dey scratch dia head to find out who di two wildcards be for Big Brother season six.
Biggie don end detective work for di viewers as im reveal Pere aand Maria as di fake housemates dis season.
Earlier Biggie bin drop strong clues during di housemates diary session on Thursday.
For Emmanuel diary session na im Biggie drop di first clue about di wildcards for di house.
“Take good note of how di housemates dey enta di diary room, for dia diary session today di wildcard dey come in one afta di oda.” Biggie tok.
Di second clue Biggie drop na say “Di wildcard know say dem be di wildcard.” Biggie tell anoda housemate Tega
Dis week, di Housemates get di task to find out who di wildcards be – and if dem guess correctly, these wildcards go dey evicted.
But, if dem fail to fish out di right Wildcards amongst dem, di Wildcards go remain for di game and go compete for di grand prize.
Dat no be all about di twist, if di wildcards no dey evicted on Sunday, dem go get exclusive power to nominate on Monday.
How di housemates enta di diary room on Thursday?
BBNaija na di biggest reality show for Africa, ova 49 kontries for di continent tune in to watch di season launch according to di organizers.
Dis season housemates dey compete for di grand prize of N90million naira worth of prizes, wey be di biggest reward since di show start.