Nnamdi Kanu: Ipob leader lawyers begin continental legal action against Nigeria and Kenya

Lawyers wey dey represent di proscribed separatist leader of di Indigenous People of Biafra Nnamdi Kanu, say dem don begin continental legal action against Nigeria and Kenya for di African Commission on Human and Peoples Rights.

Dis dey come afta di Nigerian goment fail to present Kanu for court to continue im trial on treason and terrorism related charges.

Di lawyers say dem dey demand accountability from di kontris for wetin dem claim say be illegal transfer or handing over of dia client without due process of extradition.

Kenya goment bin don deny tori say dem get hand for di arrest and eventual deportation of di Independent People of Biafra leader to Nigeria.

Di lawyers want make Nnamdi Kanu return back to Kenya as a free man and a British citizen as dem notice say for di absence of any successful extradition proceedings for Kenya, di Nigerian bench warrant wey stand against Kanu dey invalid plus e no fit dey arrested for Kenya.

Special Counsel to di secessionist leader oga Alloy Ejimako for inside statement say dem don carry di mata go di Africa Union Commission because Nigeria and Kenya na State Parties to di African Charter.

E explain say di two kontris get extradition laws wey forbid extraordinary rendition of di separatist leader.

On Monday, Federal High court for Abuja order Nigeria secret police – Department of state services – to produce Nnamdi Kanu for di next sitting date wey be 21st October.

Wetin go happun next for Nnamdi Kanu trial case?

Nnamdi Kanu wey disappear for September 2017 after im 2015 arrest still get case for court.

Getty Images

Nnamdi Kanu go remain for custody of di DSS until im next trial date.

Di trial wey suppose start on Monday, 26 July dey adjourned to 21 October 2021 because authorities fail to present am for court sake of logistical problems.

Anoda reason dem adjourn di trial na because judges for di court go soon begin dia vacation.

Di presiding judge, Justice Nyako wey vex for di development say she no dey go ahead wit di case as di defendant no dey physically present for di court.

She tell di prosecution to take any date she give serious as e dey important make Kanu dey present for im trial.

Nnamdi Kanu dey face accuse of 11 charges wey include treason, terrorism and related charges.

Kanu arrest dey come at a time wey di separatist group dey ginger more of im followers to breakaway from Nigeria to form Biafra land.