Di federal goment of Nigeria never tok anything since tori about di arrest of Yoruba activist Sunday Adeyemo, wey pipo sabi as Sunday Igboho break.
Na on Tuesday, 19, July, 2021 na im tori pipo start to dey report say authorities arrest di Yoruba activist for Cotonou, Benin Republic on Monday.
All efforts to get official confirmation of wetin dey happun for Cotonou no yield result as di authorities no release any official statement to confam or deny anything.
Igboho arrest come weeks afta Nigeria secret police, di Department of State Security Services, DSS bin declare Igboho wanted for allegedly stockpiling arms, allegation wey e don deny since.
- Latest on Yoruba activist Sunday Igboho arrest for Cotonou and wetin go happun next
- Timeline of major tins wey don happun to ‘Yoruba Nation’ activist Sunday Igboho
Wetin we know so far?
BBC Pidgin find out from pesin wey close to di case say dem arrest Sunday Igboho around 2:00am for Cotonou on Monday through joint operation.
Lead counsel for di arrested Yoruba nation activist bin say e dey likely say im client go appear for court for Benin Republic on Wednesday. E no clear weda dat one happun.
Di Senior Advocate of Nigeria, SAN, Yomi Aliyu bin say: “I know say dem go carry Sunday Igboho go court on Wednesday because di pipo wey catch am and Nigeria goment go try to get clearance to extradite am go back to Nigeria.” E tok.
Leader of di umbrella body of Yoruba Self-Determination Groups, Professor Banji Akintoye bin say e hear about di arrest of Yoruba activist Sunday Igboho for Benin Republic.
Professor Akinntoye, say e, alongside oda Yoruba Patriots wey dey immediately available dey currently work to provide assistance for Ighoho to prevent im extradition into Nigeria, say “Benin Republic na land wey respect di rules of law”.
“I receive last night di troubling information say dem don arrest Chief Sunday Adeyemo wey dem dey call Igboho for Cotonou airport.”I and oda Yoruba Patriots wey dey immediately available now dey work to provide di assistance wey dey necessary to ensure say nobody go dey able to do am anything unlawful or primitive and to prevent am from being extradited into Nigeria wey dey strongly possible.
Igboho supporters protest
Some protesters for Ibadan, Oyo State South West Nigeria enta street on Wednesday to call on goment make dem free Sunday Adeyemo.
Supporters of di yoruba nation activist enta di Lagos-Ibadan express road to protest with placards wey dem write different things inside and hala say dem no want wetin happun to MKO Abiola to happun to Sunday Igboho.
Di protesters add say dem no want di goment of Benin Republic to hand over (extradite) Sunday Igboho to Nigeria, instead make dey just release am.
Dis protest dey happun afta rumour bin spread yesterday night say dem release Igboho afta some high diplomatic intervention.
Dis no be di first time wen supporters of Sunday Igboho dey protest, early dis month, dem protest against di raid for im house wey operatives of di Department of State Services do and demand di release of di 13 pipo wey dem arrest during di raid.
Nigeria Secret Police DSS confam say dem kill two men and arrest 13 pipo wen dem raid di house of di Yoruba Nation activist for Ibadan, Oyo state on Thursday, 1st July.
Tok-tok pesin for di Nigeria Secret Police, Peter Afunanya explain say dem raid di activist house based on intelligence report say im dey gada weapons to cause kasala within di region.
For dis latest arrest wey happun for Benin republic, Nigeria goment neva tok anything about am.
Who be Sunday Igboho?
Igboho brand imself as Yoruba activist wey dey protest against how Yoruba pipo no get mouth for Nigeria again and how Fulani herdsmen, wey im say dey kill southern farmers anyhow, never enter di net of authorities.
According to reports, im grow up for Modakeke area for Osun state, south-west Nigeria but im hometown na Igboho wey dey for Oyo State.
During im early days for Modakeke, Oga Sunday bin dey do mechanic work for dia.
Im become popular during di former Oyo state govnor Rashidi Ladoja impeachment wahala for di support wey im give di govnor.
Sunday Igboho begin make news again afta e come forward since January 2021 wen e issue seven-day ultimatum to who e call killer herders for Ibarapa area of Oyo State.
Since den, e don lead im pipo and rally to demand for a Yoruba nation and to stop di farmers-herders clash for im region.
But authorities bin don cut several warnings give am about im ways and method.