Prophet TB Joshua burial live: Temitope Balogun Joshua grave, tribute and how dem bury di Emmanuel TV Synagogue preacher for Lagos

Prophet Temitope Balogun Joshua, Nigeria influential preacher wey dey known as TB Joshua don enta six feet to meet im creator.

Tears flow well-well as di family of di late Prophet TB Joshua bury am Friday afternoon for Lagos Nigeria.

Prophet Temitope Balogun Joshua burial rites last for five days and e cliamax on 9 July, 2021 inside Nigeria commercial capital.

Wia dem bury TB Joshua?

Na for inside di headquarters of Synagogue Church of All Nations [SCOAN] dem bury Prophet TB Joshua.

Each member of di immediate family family of di late pastor pay dia respect for TB Joshua grave.

Im widow Evelyn Joshua, im children Sarah Joshua, Heart Joshua, Promise Joshua all lay wreath and pour flower for dia papa graveside.

Dem build mausoleum for SCOAN premises wey house Prophet T.B. Joshua grave alias tomb.

Guests shed tears for Prophet TB Joshua burial

Right after di interment of Prophet T.B. Joshua on Friday, dem play mass Prayer video for congregants.

Di church say as di prayer video of di late TB Joshua dey play many pipo begin receive wetin di church call:

“healing and deliverance, vomiting blood and oda poisonous substances”.

Who and Who attend TB Joshua burial?

"Prophet TB Joshua burial live": [Grave, tribute] and how dem bury 'Emmanuel TV, Synagogue preacher for Lagos'

Prophet TB Joshua

Despite say dem no accept am into join body of Christian Association Nigeria pipo from different part of di world enta Lagos for im sake.

Muslims, Jews, Atheists, traditionalists and odas irrespective of dia religious difference na im attend di burial of Prophet TB Joshua

Govnors and visitors from all ova di world also show face during di burial ceremony of di preacher wey die at di age of 57.

A delegation of di Christian Association of Nigeria represented by five elders bin attend Friday burial ceremony of di preacher for Ikotun, Lagos.

Prophets and prophetesses from di church and across nations perform burial rites for TB Joshua graveside.

Traditional Ruler attend Prophet TB Joshua Burial

Olori Naomi Adeyeye Ogunwusi, di wife of di Ooni of Ife also attend di burial.

His Royal Majesty King Willard Mswati Gomani from Malawi also attend.

Tributes for TB Joshua burial ceremony

Some of di pipo wey attend di burial say despite im dislike by some pastors for Nigeria, Prophet TB Joshua hold authority.

Pastor Temitope Balogun Joshua bin get millions of followers and connections all over di world.

Di Govnor of di home state of late Prophet TB Joshua personally pay tribute to di Nigerian preacher.

Ondo state govnor Rotimi Akeredolu say TB Joshua na gift to di world and di pipo don lose a rare gem.

Na during im burial ceremony today Govnor Akeredolu tok dis one.

Shirley Murdock perform “Spirit Pray Through Me”, one song Prophet T.B. Joshua compose, during di interment ceremony.

Many other music groups also perform to pay dia last respect to di preacher Temitope Balogun Joshua.

Popular quotes of “Prophet TB Joshua”

Prophet Temitope Balogun Joshua followers for both Emmanuel TV and Synaguogue Church of All Nations go always remember dis quotes:

“Di Holy Spirit dey more interested in wetin we do secretly, privately because di one you serve for secret go stand to reward you for open.”

Dat na one of di greatest quotes of late Prophet TB Joshua.

Dis na according to Prophet Chris wey be di guest preacher for di final burial of di popular televangelist.

Di guest preacher encourage worshippers follow all di doctrine of di late prophet.

“Di secret of Prophet T.B. Joshua ministry in front of dis altar na im lifestyle behind di altar. Di preacher add.

“All im good work wey everybody dey see na sake of im relationship wit God.” Prophet Chris conclude.

Oda popular ‘quotes of Prophet TB Joshua’:

“To leave your battle for God” – Prophet TB Joshua

“To see your situation as reason to draw closer to God” – Prophet TB Joshua

“To let go of offence, bitterness and bad feelings towards odas.” – Prophet TB Joshua

“To take care of your heart” – Prophet TB Joshua

“To meditate on God Word” – Prophet TB Joshua

“To love God above all” – Prophet TB Joshua

“To follow di path of faith and humility” – Prophet TB Joshua

“To preach salvation, not condemnation” – Prophet TB Joshua

“To let love lead, irrespective of race or religion” – Prophet TB Joshua

“Love wey get hand to help witout expectation, wey get leg to move to di needy, wey get eyes to see misery and want” – Prophet TB Joshua

“Love wey ears to hear di sighs and sorrows of men.” – Prophet TB Joshua

“To watch and pray.” – Prophet TB Joshua

TB Joshua profile

Prophet T. B. Joshua na Nigerian pastor, televangelist and philanthropist popular through organizing ‘miracle, healing and deliverance’ program.

Dem born Temitope Balogun Joshua for June 12, 1963 for Ondo state, Nigeria.

According to di website of Synagogue Church of All Nations, Joshua remain for im mama womb for 15 months before dem born am.

Joshua attend St. Stephen Anglican Primary School (Ikare-Akoko, Nigeria, 1971-1977).

But e no fit complete one year of secondary school education.

Young TB Joshua drop out from secondary school for first year and work for one poultry farm.

For school, dem know am as ‘small pastor’ because of im love for di Bible.

Dat time im get ability to predict tins wey wan happun for im community, according to SCOAN website.

E be also di leader of ‘Scripture Union’ during di time wey e dey school.