Seyi Shay, Victori Kimani, Tiwa Savage: ‘Beauty salon beef video’ & di real ‘Tiwa’ profile

Tiwa Savage and Seyi Shay video wey show dem beef and throw insult at each oda na im don flood Nigerian local tori.

Di beauty salon video gbas-gbos dey make pipo tok about di two female top Nigerian musicians.

No be today wen Afropop singer, Seyi Shay rumoured rivalry with Nigerian ‘Queen of Afrobeats’ Tiwa Savage start.

But Seyi don tok am before say she no see Tiwa as a rival. So BBC Pidgin don torchlight how di two celebs don grow dia careers recently.

Tiwa Savage and Seyi Shay profiles

Getty Images
Na from Tiwa Savage albums Once Upon A Time for 2013 and R.E.D for 2016 she get di name of Queen of Afrobeats.

Tiwa Savage – From Kele-Kele Love to Mavins Queen and now Universal Music sign on

Tiwa Savage burst for di Nigerian music scene for 2011 to catch dia attention with di gbedu wey dem call Kele Kele Love.

E feature love song wey Nigerians bin enjoy, she follow dat one wit plenti love gbedu wey include Love me, Love Me, Ife Wa Gbono.

And she also sing ‘Don’t Leave without my heart’ wey she do with producer, Don Jazzy.

Then for 2013, she cari her tent pitch am for Mavins Records wia she drop two ogbonge albums Once Upon A Time for 2013 and R.E.D for 2016.

Na also for dia she get di name of Queen of Afrobeats.

Outside music, she bin feature for di Health TV Series wey dem bin call Sugar and also be activists against rape cases dem.

For May, 2020, Mama Jam-Jam (nickname of her pikin Jamil) port comot from Mavins to join Universal Music Group on an exclusive music deal wey go see her new music enta international market.

And true to di contract, wen for August she drop her fourth studio album, Celia. E see two songs for di album, Dangerous Love and Korobba peak for No 2 and No 9 for Billboards.

So far, Tiwa Savage don collabo with stars like Wizkid, Davido, Sam Smith, Beyonce, and Omarion.

Seyi Shay – Yolo Yolo Queen

Getty Images
Afropop singer, Seyi Shay

Seyi Shay real name na Deborah Oluwaseyi Joshua Odedere.

She be Nigerian based singer, song writer, recording artist and performer.

Her song Seyi or Shay wey she release for 2015 blow her into limelight.

Shay sign her first record deal with No Apology. For 2006, she form girl Band, Boadicea. Di band scata for 2008.

Tori be say she enta Nigeria for 2011 an na time she sign record contract with Flytime Records.

Hit songs like Right Now, Yolo Yolo, Gimme Love, Irawo, make her popular.

Nigerian Idol bin reveal her as one of di judges wey go dey for di 2021 show.

Di singer, wey start to dey sing at age six, considers herself fortunate to don collect inspiration from fellow artiste, Sound Sultan.

Victoria Kimani

Kenyan Star, Victoria Kimani na pesin wey blow for di Nigerian scene wen she do di remix for Ice Prince hit song, Oleku remix.

Then for November 2012, she join di record label, Chocolate City.

And na for inside di record label, she comot with di album, Safari for 2016 before she comot di label for 2017.

She don win di Nigeria Entertainment Award for African Female Artist of di Year (Non Nigerian) for 2018.

She don work with stars like Busta Rhymes, Cassie among odas.