ASUU President: Emmanuel Osodeke, ASUU new president & di issues wit Federal Goment

Di new leader of Nigeria university lecturers union don reveal how im wan tackle issues wey concern dem.

Emmanuel Osodeke just become national president of Academic Staff Union of Universities [ASUU].

“My goal na to reposition di Nigeria University to fit compete wit oda university for across di globe.”

“So dat instead of Nigerian students to di go oda kontri to go school, oda kontri pipo go dey come Nigeria.”

Na so Professor Osodeke, wey succeed Biodun Ogunyemi, tok as di new ASUU presido.

E further explain say successive goment don neglect di education sector and e don make am rotten.

Di union new leader also tok about dia recent agreement wit goment before dem call off dia last strike

Professor Emmanuel Osodeke say some of di agreement wey dem reach, goment neva meet am.

E specially regarding di implementation of dia payment system-UTAS, e tok.

Osodeke say some of dia colleague neva still get dia pay.

On top insecurity for schools, e say dis problem don pass be careful.

Goment must take di responsibility to address di security wahala and protect schools dem. E add.

Unresolved issues wey ASUU get with di Nigeria “Federal government”

Last year ASUU bin accuse di federal gomment of blackmail, intimidation and propagation of falsehood.

Dem say instead of di goment to tok true and find how goment go take settle , na lie dem carry give public on top di strike matter.

See some of di unresolved issues:

– No capital project for universities except di ones wey TETFund dey sponsor. Dem say dis one dey somehow for a kontri wey get gomment.

– Dem say gomment no dey willing to fulfil di 2009 FGN-ASUU agreement wey state say make dem provide moni wey dem go take repair schools across di kontri .

– Hostels, class rooms, laboratories and better offices for lecturers dem dey among di tins wey dem wan take moni do but e no dey possible sake of gomment sti;ll dey owe dem.

– Anoda matter wey dey unresolved na payment Earned Academic Allowances (EAA).

– Dem no get governing council. make dem set up visitation panels wey go monitor how dem dey spend di moni and how dem dey manage di schools.

– ASUU also tok say goment take style introduce make dem enrol university teachers for di Integrated Personnel and Payroll Information System(IPPIS) so dat e go cover dia insincerity.

– ASUU say gomment still dey owe dem plenty billions of naira. Dem say na dis moni dem suppose take pay salary arrears of members

Professor Emmanuel Osodeke profile

Place of Birth: Osodeke na native of Kokori Inland, Ethiope East Local Government Area of Delta State.

Education: E get B.Sc. for Rivers state University of Science and Technology, Port Harcourt, 1986/1987 session.

Prof. Osodeke also bag Masters of Science degree in Soil Science from di University of Ibadan, in 1989.

Professor Osodeke also get Doctor of Philosophy Degree from Michael Okpara University of Agriculture, Umudike for 2002.

E get Post-Graduate Diploma in Agro-meteorology from di Israeli Institute of Meteorology, Bet Dagan Israel in 1994.

Career: Professor Osodeke start work for di Rubber Research Institute of Nigeria, Benin City for 1990.

E later move to di Delta State University Abraka and e currently bi Professor of Soil Chemistry for di Michael Okpara University of Agriculture, Umudike.

Im na visiting Professor for di University of Calabar. Presently im also be visiting Professor for di West African Science Service Centre on Climate Change and Agricultural Land-Use (WASCAL) for di University of Cape Coast, Ghana.

Professor Osodeke be member of several Professional Associations, like Soil Science Society of Nigeria, di International Soil Science Society, Agricultural Society of Nigeria and oda ones.

Positions: Professor Emmanuel Osodeke don hold plenti administrative positions; Member of university Senate, Head of Department, Director of Programme, two times member of the University Governing Council.

Osodeke be a member of di Advisory Board of WASCAL, Ghana. Di professor get more dan hundred scholarly publications for local and international journals.

He don supervise more dan twenty (20)M. Sc. and eighteen (18) Ph.d Candidates.

Professor Osodeke be di chairman, Academic Staff Union of University (ASUU), Michael Okpara University of Agriculture, Umudike, Zonal Coordinator of Calabar Zone and Nsukka zone, National Financial Secretary, Vice President and presently di President of di Union.

Social activities: Oga Osodeke bi Chartered member of di Rotary Club of Umudike central, past President, Assistant District Governor and Abia state Rotary Polio Representative.

Religion: Professor Osodeke na Devoted Catholic, and was di Chairman Umuahia Diocesan Laity Council.

Marriage: E dey married to Onome and di marriage dey blessed wit four boys.